El Muséu de Belles Artes d’Asturies ye ún de los museos provinciales de belles artes más importantes d’España. Abrió les puertes en 1980 con una colección pequeña compuesta por obres procedentes de la Comisión Provincial de Monumentos Históricos y Artísticos, creada en 1844; del antiguu Muséu de l’Academia Provincial de Belles Artes de San Salvador, fundáu en 1889; y de la colección d’arte de la desapaecida Diputación Provincial, na que col pasu del tiempu acabaron confluyendo los dos corpus patrimoniales mentaos. En total, un conxuntu de 350 obres, que trenta y cinco años más tarde, gracies a una política rigorosa d’adquisiciones, lo mesmo que de donaciones, legaos, depósitos y daciones, yá sumen más de 15.000. Ente toes elles destaquen les qu’integren la Colección Pedro Masaveu, que pasó al Principáu d’Asturies a últimos de 1994 como dación en pagu d’impuestos de socesión, y que se depositó nel Muséu a partir de 1996.
Sala d’Arte Barrocu.
La pintura ye’l nucleu más importante de la colección actual del Muséu, que tien obra de dalgunos de los artistes asturianos y españoles más importantes de los sieglos XIV al XXI, como El Greco, Ribera, Zurbarán, Murillo, Carreño de Miranda, Luis Meléndez, Goya, Sorolla, Evaristo Valle, Nicanor Piñole, Picasso, Miró, Dalí, Luis Fernández, Palazuelo, Tàpies y Barceló, ente otros. Tamién hai dellos exemplos de pintura internacional, representada por autores hispano-flamencos de los sieglos XV y XVI, Tiziano, Veronés, Rubens, John Philip, Foujita, etc., amás d’obra de delles de les artistes muyeres más destacaes de tolos tiempos, como Sofonisba Anguissola, Angelica Kauffmann, Ana y Francisca Meléndez y María Blanchard, ente otres.
La escultura ta representada por artistes dende’l Barrocu hasta los nuestros díes, sobre manera asturianos y españoles, como Luis Fernández de la Vega, Antonio Solá, Elías Martín Riesco, Agustín Querol, Francisco Pérez del Valle, José Gragera, Pablo Gargallo, Baltasar Lobo, Faustino Goico-Aguirre, Manuel Álvarez-Laviada, Sebastián Miranda, Antón, Víctor Hevia, César Montaña, Amador, Rubio Camín, Navascués, etc.
Sala d’Arte Nuevu y de Vanguardia. Semeya: Marcos Morilla
El Muséu de Belles Artes d’Asturies tamién guarda unos fondos bien ricos d’artes gráfiques y fotografía. Na sección de dibuxu destaquen sobre manera les obres de los sieglos XIX y XX, particularmente les de los viaxeros románticos españoles y estranxeros, como Genaro Pérez Villaamil, David Roberts y Adrien Dauzats, ente otros. El fondu de grabáu, que va dende’l sieglu XVI hasta l’actualidá, ufierta estampes culminantes de Piranesi y Goya, al empar qu’otros conxuntos bien valiosos de grabadores asturianos y españoles, como Picasso y Solana, por mentar dalgunos. Interesante tamién ye la colección de cartelos de cine, que supera les 1.000 unidaes. Pela so parte, nel fondu fotográficu sobresalen exemplares de Charles Clifford, Jean David, Jean Laurent y los asturianos Octavio Bellmunt, Joaquín García Cuesta y Luis Muñiz-Miranda, amás d’otros de fotógrafos contemporáneos.
Completa la colección la sección d’artes industriales, compuesta por más de 5.000 pieces de vidru, lloza y planches calcográfiques pa la estampación sobre lloza de fábriques como La Industria, La Asturiana, San Claudio y la Real Fábrica de Sargadelos, ente otres.
